Шинжлэх ухаан, технологийн их сургуулийн 2024-2025 оны хичээлийн жилийн намрын улирлын бакалаврын 93, магистрын 55 дэх удаагийн төгсөлт  2025 оны нэгдүгээр сарын 20-ний өдөр ёслол төгөлдөр зохион байгуулагдаж байна.

Энэ удаагийн төгсөлтөөр доктор 10, магистрын зэргийн дипломтой 166, бакалаврын дипломтой 618 төгсөгч төгссөнөөс онцлох дипломтой 34, нийт 794 төгсөгч амжилттай төгсөн гарч байна. Тэргүүлэх эрэлттэй мэргэжлээр Япон, БНХАУ, БНСУ-ын 6 их, дээд сургуультай хамтарсан бакалаврын 2+2 хөтөлбөрөөр 13 оюутан хос дипломтой төгсөн гарч байна.

Төгсөлтийн ёслолын арга хэмжээнд ШУТИС-ийн ректор доктор (Ph.D), профессор Т.Намнан болон проректор, бүрэлдэхүүн сургуулийн захирал,  салбарын эрхлэгч, эрдэмтэн, профессор багш, төгсөгчид оролцлоо. Төгсөлтийн арга хэмжээг ШУТИС-ийн захирал Т.Намнан “Боловсрол, шинжлэх ухааны салбарын орчин үеийн өөрчлөлт шинэчлэлт, инновац, технологи дамжуулалт, шинэ мэдлэгийг буй болгогч манай их сургууль улс орныхоо хөгжил дэвшилд бодитой хувь нэмэр оруулж ирсэн баялаг түүх, өв уламжлалтай билээ. Энэ хугацаанд инженер, технологи, менежмент, бизнес, нийгэм, хүмүүнлэгийн чиглэлийн 100 мянга гаруй мэргэжилтнийг төгсгөн гаргаж, төгсөгчид маань өөрсдийн мэргэжил чиглэлээр олон улсын байгууллагуудад болон, эх орныхоо бүтээн байгуулалтын талбарт үр дүнтэй ажиллаж байна. Та бүхний төгсөн гарч байгаа энэхүү хичээлийн жил манай их сургуулийн түүхэн 65 жилийн ой тохиож байгаагаараа онцлог юм” хэмээн үг хэллээ.

Төгсөлтийн ёслолын ажиллагаанд мэндчилгээ дэвшүүлж БуХС-ийн профессор А.Болормаа багш өгсөгчдөд хандан үг хэллээ. Мөн нийт төгсөгч оюутнуудаа төлөөлөн БАТС-ийн магистрын шилдэг төгсөгч Г.Доржханд мэндчилгээ дэвшүүлж эрдэмтэн багш нар, гэр бүл, найз нөхөд, хүндэт зочид төлөөлөгчдөдөө хандан баярын сэтгэгдлээ хуваалцлаа. Тэрээр “ШУТИС бол зөвхөн мэдлэг олгох төдий бус, монголын салбар салбарын манлайлагчдыг бэлтгэдэг, өөрийгөө нээх, хөгжүүлэх олон боломжийг олгодог эрдмийн өргөө гэдгийг би төгсөгчийн хувьд бахархалтайгаар хэлье. Тус сургуульд суралцсанаар бид бүхэн зөвхөн мэргэжлийн хувьд ахиж дэвшээд зогсоогүй, аливаад хариуцлагатай, судалгаанд суурилсан шинэлэг санаа, шийдлийг эрэлхийлэгч, бүтээлч сэтгэлгээтэй, багийн тоглогч байхад суралцсан юм” гэлээ. Мөн бакалаврын шилдэг төгсөгч Б.Болдбаатар төгсөгчдөдөө хандаж үг хэлсэн юм.

Төгсөгчдөд диплом олгох ШУТИС-ийн ректорын тушаалыг Сургалтын бодлого, хөтөлбөрийн албаны дарга доктор М.Эрдэнэтуяа уншиж танилцуулснаар ШУТИС-ийн төгсөгчдөд диплом гардуулах ёслолын үйл ажиллагаа  эхэлсэн.

Төгсөлтийн ёслолын ажиллагаанд Оюутны хөгжил, соёл үйлчилгээний албаны мэргэжилтэн Ц.Болдбаатар ШУТИС-ийн сүлд дуу  “ШУТИС бидний бахархал”  дууг  дуулан нийт төгсөгчдөдөө мэндчилгээ дэвшүүлэв.  Ёслолын ажиллагааны төгсгөлд төгсөгч оюутнууд тангараг өргөж, малгай шидэлтийн баяраа хийн ёслолын ажиллагаа амжилттай өндөрлөлөө.

Шинжлэх ухаан технологийн их сургуулийн төгсөгч, мэргэжилтнүүд та бүхэндээ баяр хүргэж, хамгийн сайн сайхан бүхнийг хүсэн ерөөе. Нийт төгсөгчдөдөө цаашдын үйл хэрэг, ажил амьдралын замнал нь урт, өргөн, ямагт өөдөө байхын   эрхэм   ерөөлийг   өргөн дэвшүүлье!

Төгсөлтийн ёслолын ажиллагааны I ээлжийн зураг татаж авах

https://drive.google.com/drive/folders/1S-_Rf3YQtssPBWVjf8NnMwFngUL5OWu8?usp=drive_link

https://drive.google.com/drive/folders/1BbLTbsIWIpwaDW9ICd7WkT9oHmJUrGDY?usp=drive_link

https://drive.google.com/drive/folders/1-MTlkhsGNY8mhsvEKxOBF48fVyvlhpUI?usp=drive_link

https://drive.google.com/drive/folders/1x0THa7COBjYtfKWHn0yL4sj7JFlxJhF9?usp=drive_link